Öldruðum hjónum stíað í sundur

Nítíu og fjögurra ára gamall maður fær ekki að dvelja með eiginkonu sinni á dvalarheimili þar sem hann er sagður of vel á sig kominn. Eiginmaðurinn hefur lést og heilsu hans hrakað síðan þeim hjónum var stíað í sundur.

Þau Sumarrós Sigurðardóttir 88 ára og Sigurður Ringsted Ingimundarson 94 ára hafa verið gift í meir en 60 ár. Þau hafa búið í eigin húsnæði og átt lögheimili á Akureyri í aldarfjórðung.

Milli jóla og nýárs í fyrra flutti Sigurrós inn á dvalarheimilið Hlíð af heilsufarsástæðum. Maðurinn hennar sótti einnig um vist en fékk þau svör að ekki væri þörf á stofnanavist hans að sinni. Ef ekkert heyrðist frá honum innan átján mánaða yrði haft samband og aðstæður endurskoðaðar ef þörf væri á.

Hjónunum er því gert ókleift að eyða ævikvöldinu saman. Börnum hjónanna þykir afgreiðslan fráleit, ekki síst út frá heilsufarsástæðum gamla mannsins.

Hjá Akureyrarbæ fengust þær upplýsingar, hjá þeim sem séð hefur um mál Sigurðar, að ekki væri rætt við blaðamenn um einstaklingsmál.