Ábyrgð hjá útgerð og tryggingarfélagi

Umhverfisráðherra segir að útgerð og tryggingafélag flutningaskipsins Wilson Muuga beri ábyrgð á því að koma skipinu af strandstað við Sandgerði fyrir nítjánda júní næstkomandi. Útgerðin og tryggingafélagið hafa sagt að þau beri einungis kostnað upp að rúmum 70 milljónum króna en ráðherra segir ábyrgð þeirra í þessum efnum ótvíræða.

Björgvin G. Sigurðsson, þingmaður Samfylkingarinnar, spurði umhverfisráðherra um það á Alþingi í dag, hvernig yrði staðið að því að hreinsa flak Wilson Muuga úr Hvalsnesfjöru þar sem skipið strandaði hinn 19 desember síðast liðinn. Þingmaðurinn vakti athygli á að útgerð og tryggingafélag skipsins teldu sig ekki þurfa að standa undir meira en rúmlega 70 milljónum króna við það verk, en ljóst er að það mun kosta mun meira.

Björgvin sagði að leiða þyrfti til lykta hver kostnaðurinn væri við að fjarlægja flakið, hver bæri ábyrgð á því og hvenær það yrði gert.

Jónína Bjartmarz, umhverfisráðherra, sagði að bæði eigendur skips og tryggingafélags gætu gengið lengra en lög kvæðu á um en ábyrgðin væri ótvíræð. Þeir bæru lagalega skyldu í málinu enda væri ótvírætt að eigenda skipsins bæri að fjarlægja það sem fyrst og eigi síðar en sex mánuðum eftir strand.

Björgvin ítrekaði að stjórnvöldum bæri að sjá til þess að skipið yrði flutt af strandstað og hreinsað upp eftir það, hvað sem liði afstöðu útgerðar og tryggingafélags.