Slíta ætti stjórnarsamstarfinu vegna svika í stjórnarskrármálinu

Kristinn H. Gunnarsson, þingmaður Framsóknarflokksins, segir að Framsóknarflokkurinn ætti að slíta stjórnarsamstarfinu við Sjálfstæðisflokkinn vegna vanefnda um að setja ákvæði um sameign þjóðarinnar á auðlindum landsins inn í tillögur um breytingar á stjórnarskránni. Hann segist ekki eiga samleið með flokki sem hafi farið eins mikið á svig við stefnumál sín og flokkurinn hafi gert á þessu kjörtímabili.

Það liggur í loftinu að Kristinn H Gunnarsson sé að yfirgefa Framsóknarflokkinn. Í hádegisviðtalinu í dag vildi hann ekki segja neitt um framtíðaráform sín annað en að hann hygðist áfram vinna á vettvangi stjórnmálanna. Hann er hins vegar mjög óánægður með vinnubrögð síns eigin flokks.

"Ég myndi vera áfram í Framsóknarflokknum þó ég kæmist ekki inn á þing ef flokkurinn væri að vinna að þeirri stefnu sem ætlar sér að gera eða segist ætla að gera," sagði Kristinn.

Þannig að þú ert á leið út úr Framsóknarflokknum?

"Ég vil ekki vinna með flokknum að framkvæma þá stefnu á næsta kjörtímabili sem hann hefur verið að framkvæma á þessu kjörtímabili.Það er alveg ljóst."

Kristinn sagði flokkinn hafa gengið of langt í einkavæðingarmálum og þá hefði flokkurinn beinlínis svikið fyrirliggjandi stefnu sína varðandi Ríkisútvarpið.

"Nú tekur flokkurinn U beygju og framkvæmir niðurstöðu eða stefnu sem er þvert á móti því sem flokkurinn hafði kynnt sig fyrir og sagt kjósendum að hann stæði fyrir. Ég get ekki tekið þátt í svona U beygju," sagði Kristinn.

Stærsta málið segir Kristinn hins vegar vera það kosningaloforð flokksins að tryggja það í stjórnarskrá að auðlyndir hafsins séu sameign þjóðarinnar. Þetta atriði hafi verið sett í stjórnarsáttmála en þegar stjórnarskrárnefnd skilaði af sér hafi þetta mál ekki verið inni vegna ágreinings í nefndinni.

"Og hver gerir þann ágreining? Það getur varla verið Framsóknarflokkurinn. Og ég spyr, er Sjálfstæðisflokkurinn að gera þennan ágreining? Og ef Sjálfstæðisflokkurinn er að neita að standa við stjórnarsáttmálann, ef Sjálfstæðismenn vilja ekki standa við stjórnarsáttmálann, þá á Framsóknarflokkurinn að slíta þessari ríkisstjórn," sagði Kristinn.

Á þessu, núna?

"Á þessu máli núna að sjálfsögðu. Vegna þess að þetta er eitt stærsta málið sem um verður tekist næstu árin; það er eignin á auðlindunum," sagði Kristinn H Gunnarsson.