Flugstoðir leggja ekki niður flugvelli

Flugstoðir ohf segja ekkert hæft í fullyrðingum Arngríms Jónssonar flugstjóra og formanns Flugmálafélags Íslands þess efnis, að Flugstoðir hafi lagt niður Ólafsfjarðarflugvöll. Hjördís Guðmundsdóttir, upplýsinga- og kynningarfulltrúi Flugstoða, segir að Ólafsfjarðarflugvöllur hafi verið lagður af um síðustu aldamót í samvinnu við yfirvöld á staðnum, og þá voru Flugstoðir ohf ekki til.

Arngrímur segir í grein sem hann skrifaði í blaðið Vikudag á Akureyri, að Flugstoðir hafi að undanförnu lagt niður flugvelli víða um land án þess að gefa viðkomandi sveitarstjórnum tækifæri til að taka við rekstir vallanna. Hann segir að vellirnir séu víða mikilvæg öryggistæki vegna veikinda eða slysa og að í flestu tilvikum sé viðhald þeirra einfalt og ódýrt í framkvæmd. Hjördís mótmælir þessu harðlega. "Flugvöllum á Íslandi er hvorki fækkað né fjölgað nema það sé tekið fram í samgönguáætlun sem samþykkt er af Alþingi Íslendinga," segir hún.

Hjördís segir að í þjónustusamningi sem var gerður milli Samgönguráðuneytisins og Flugstoða ohf. segi að Flugstoðum beri að halda sama þjónustustigi á flugvöllum og áður var. Flugstoðir ohf séu reyndar ekki eigandi af flugvöllum á Íslandi heldur sjái um rekstur þeirra og uppbyggingu. "Flugstoðir hefur á morgun starfað í einn mánuð og hefur ekki á þeim tíma lagt niður flugvelli," segir Hjördís

Hún segir flugmálayfirvöld átta sig á hlutverki sínu að halda flugvöllum opnum vegna sjúkraflugs og því hafi á síðasta ári verið settur á laggirnar vinnuhópur þar sem starfsmenn frá Heilbrigðis- og Tryggingamálaráðuneytinu, Tryggingastofnun og Flugmálastjórn fóru yfir þessi mál. Í framhaldi af þeirri vinnu skilgreindi fyrrnefnt ráðuneyti og Tryggingastofnun hvaða lendingarstaðir aðrir en áætlunarflugvellir hefðu mesta þýðingu vegna sjúkraflugs á Íslandi. Flugstoðir ákveði því ekki einhliða að leggja niður velli sem nauðsynlegir eru þjóðinni vegna sjúkraflugs.