Reyna að ná bíl upp úr Ölfusá

Lögregla og björgunarsveitarmenn eru að undirbúa að ná fólksbíl upp úr Ölfusá, við erfiðar aðstæður. Hann hafnaði í ánni í gærkvöldi og björgunarmenn unnu frækilegt björgunarafrek við að bjarga ökumanninum.

Þeir björguðu ungum manni úr bráðum lífsháska á elleftu stundu á ellefta tímanum í gærkvöldi eftir að bíll hans rann í hálku og hafnaði út í ánni. Svo vel vildi til að bíllinn stöðvaðist á steinnibbu á barmi dýpisins og maraði þar í hálfu kafi þegar björgunarmenn komust að honum á stórum slöngubáti.

Þá var maðurinn orðinn mjög kaldur og nær meðvitundarlaus. Þegar búið var að ná honum upp í bátinn vildi ekki betur til en svo að það drapst á báðum utanborðsmótorum hans svo hann rak niður fyrir brúnna en kenndi grunns á sandrifi, þaðan sem hann var dreginn á land.

Maðurinn var fluttur á slysadeild Landsspítalans og er á batavegi. Ölfusá hefur verið í vexti síðustu daga vegna hlýinda og rigninga en rennslið er heldur að sjatna á ný.