Saha valinn á kostnað Trezeguet

Raymond Domenech hefur valið landslið Frakklands sem mætir Færeyjum og Litháen síðar í mánuðinum.

Helstu fregnir eru þær að Domenech velur Louis Saha, leikmann Manchester United, aftur í liðið en David Trezeguet hjá Juventus er í kuldanum.

Saha hefur ekki spilað með franska landsliðinu síðan í 1-0 sigri Frakka á Grikkjum í vináttulandsleik í nóvember í fyrra.

Trezeguet hefur skorað sjö mörk í ítölsku úrvalsdeildinni á tímabilinu en mistókst að skora í 1-0 tapi Frakka fyrir Skotum í síðasta mánuði á heimavelli.

„Það ríkir mikil samkeppni um stöður framherja í landsliðinu," sagði Domenech á blaðamannafundi.

Miðvallarleikmenn Arsenal, Mathieu Flamini, Abou Diaby og Lassana Diarra voru allir valdir í liðið.

Patrick Vieira er ekki í liðinu vegna meiðsla en William Gallas var valinn þrátt fyrir að hann sé meiddur á nára.

„Gallas mun hefja æfingar með félagi sínu á morgun og telur góðar líkur á því að hann geti spilað á sunnudaginn."

Frakkland mætir Færeyjum þann 13. október á útivelli og tekur svo á móti Litháen fjórum dögum síðar.

Frakkar sitja sem stendur í þriðja sæti B-riðils, stigi á eftir Ítölum og tveimur á eftir Skotum.

Hópurinn:

Markverðir: Sebastien Frey (Fiorentina), Mickael Landreau (Paris St. Germain) og Ulrich Rame (Girondins Bordeaux).

Varnarmenn: Eric Abidal (Barcelona), Julien Escude (Sevilla), Patrice Evra (Manchester United), William Gallas (Arsenal), Philippe Mexes (AS Roma), Bakary Sagna (Arsenal) og Lilian Thuram (Barcelona).

Miðvallarleikmenn: Abou Diaby (Arsenal), Lassana Diarra (Arsenal), Mathieu Flamini (Arsenal), Claude Makelele (Chelsea), Jerome Rothen (Paris St. Germain) og Jeremy Toulalan (Olympique Lyon).

Framherjar: Nicolas Anelka (Bolton Wanderers), Karim Benzema (Olympique Lyon), Sidney Govou (Olympique Lyon), Thierry Henry (Barcelona), Florent Malouda (Chelsea), Franck Ribery (Bayern München) og Louis Saha (Manchester United).