Fyrsti sigur Lúxemborgar í tólf ár

Íbúar Lúxemborgar fagna nú fyrsta sigri landsliðsins í undankeppni stórmóts í tólf ár eftir að liðið lagði Hvíta Rússland á heimavelli um helgina, 1-0.

Fons Leweck skoraði sigurmark Lúxemborgar í fimmtu mínútu uppbótartíma og liðið fagnaði ótrúlegum sigri.

Þetta voru fyrstu stig Lúxemborgar í 55 leikjum í undankeppni stórmóts í röð.

Allir leikmenn landsliðsins eru áhugamenn fyrir utan einn. Það er Mario Mutsch, leikmaður FC Aarau í Sviss.

„Ég óska leikmönnunum innilega til hamingju," sagði Guy Hellers, þjálfari liðsins. „Við höfum alltaf verið lítilmagninn og sjaldan átt tækifæri á því að vinna leik. Ég held þó að við eigum þetta skilið. Ég sagði fyrir tíu dögum að biðin eftir sigrinum væri stutt en ég átti ekki von á því að hún yrði svo stutt."