Íslenska vörnin sú sjöunda slakasta í Evrópu

Ísland hefur fengið á sig 21 mark í tíu leikjum til þessa í undankeppni EM 2008. Það er sjöundi slakasti árangur allra liða í keppninni.

Ísland tapaði um helgina, 4-2, fyrir Lettlandi og hefur samtals fengið átta lettnesk mörk á sig. Þá ætti 5-0 tap Íslands í Svíþjóð enn að vera mönnum í fersku minni.

Meðal þeirra liða sem hafa fengið færri mörk á sig að meðaltali í keppninni eru Hvítarússland, Lúxemborg, Kýpur, Georgía, Moldóva og Kasakstan.

Öll liðin sem hafa fengið fleiri mörk á sig að meðaltali í keppninni eru í neðsta styrkleikaflokknum og þekkt sem smálið Evrópu.

Ísland var eitt sinn meðal smáliða Evrópu en bættur árangur á undanförnum áratug hefur orðið til þess að önnur lið hafa borið meiri virðingu fyrir Íslandi. Það getur varla verið tilfellið lengur eins og þessi tölfræði ber vitni um.

Ísland var í fimmta styrkleikaflokki þegar dregið var í riðla í undankeppni EM 2008. Öll hin liðin í sama flokki hafa fengið færri mörk á sig sem og öll liðin í sjötta styrkleikaflokki.

Þau sex lið sem eru með verri vörn en þá íslensku koma öll úr sjöunda og neðsta styrkleikaflokki. Tvö lið í neðsta flokknum, Lúxemborg og Kasakstan, hafa fengið á sig færri mörk en Ísland.

Þegar Eyjólfur Sverrisson tók við íslenska landsliðinu var dagsskipunin einföld. Að fá á sig færri mörk. Ísland fékk á sig 27 mörk í tíu leikjum í síðustu keppni. Að því leytinu til hefur Eyjólfur náð sínu markmiði því Ísland hefur nú þegar leikið tíu leiki í þessari undankeppni og fengið á sig 21 mark.

Liðið hefur einnig innbyrt átta stig, tvöfalt fleiri en í síðustu undankeppni. Enn á Ísland tvo leiki eftir í riðlinum en fleiri lið eru í riðli Íslands nú en í síðustu undankeppni.

Þau lið sem hafa fengið flest mörk á sig í undankeppni EM 2008:

1. San Marínó: 5,00 að meðaltali í leik (50 mörk í 10 leikjum)

2. Færeyjar: 3,50 (35/10)

3. Andorra: 3,27 (36/11)

4. Liechtenstein 2,80 (28/10)

5. Aserbaídsjan 2,11 (19/9)

-  Malta 2,11 (19/9)

7. Ísland 2,10 (21/10)

8. Hvíta Rússland 2,00 (20/10)

-  Lúxemborg 2,00 (20/10)

-  Slóvakía 2,00 (20/10)

11. Eistland 1,91 (21/11)

12. Bosnía 1,90 (19/10)

13. Kýpur 1,89 (17/9)

14. Wales 1,78 (16/9)

15. Georgía 1,70 (17/10)

-  Ungverjaland 1,70 (17/10)

-  Moldóva 1,70 (17/10)

18. Kasakstan 1,64 (18/11)

19. Úkraína 1,33 (12/9)

20. Belgía 1,27 (14/11)

Skáletruð lið eru í neðri styrkleikaflokki en Ísland.