Sterkt samband á mili steranotkunar og ofbeldisverka

Samkvæmt upplýsingum frá Lyfjaráði ÍSÍ verða framkvæmd um 170 til 175 lyfjapróf í reglubundnu eftirliti á þessu ári en í lyfjaprófunum er sérstaklega skimað eftir steranotkun og öðrum örvandi efnum. Undanfarin ár hefur þó engin áberandi aukning orðið á steranotkun meðal íslensks íþróttafólks.

Samkvæmt upplýsingum frá Skúla Skúlasyni, lyfjafræðingi sem situr í Lyfjaráði ÍSÍ, hafa rannsóknir og fréttir frá Norðurlöndum sýnt að fylgifiskur óhóflegrar steranotkunar sé ofbeldishneigð og sterk fylgni sé á milli ofbeldisverka og steranotkunar. Nýleg sænsk rannsókn sýnir í fyrsta sinn fram á tengsl steranotkunar og vopnaðs ofbeldis og staðfestir að glæpamenn noti markvisst stera ekki síður en önnur eiturlyf. Ein helsta birting ofbeldis sem tengist steranotkun er gróft heimilisofbeldi.

Miklar sveiflur eru á því magni stera sem lögreglan hefur lagt hald á en árið í fyrra og þetta ár virðast ætla að setja met hvað þetta varðar. Engar viðlíkar rannsóknir og á Norðurlöndum um samband afbrota og steranotkunar hafa þó verið gerðar hér á landi, og þegar um er að ræða ofbeldismál skoðar lögregla ekki sérstaklega hvort um steranotkun sé um að ræða.