Vilja byggja upp alþjóðlegt orkufyrirtæki

Geysir Green Energy í eigu FL Group, Glitnis og VGK Hönnunar, og Reykjanesbær hafa undirritað viljayfirlýsingu um samstarf í þeim tilgangi að byggja upp leiðandi alþjóðlegt orkufyrirtæki.

Í fréttatilkynningu segir að gert sé ráð fyrir að Geysir taki þátt í kostnaði við uppbyggingu á orkusetri í bænum í samvinnu við Reykjanesbæ og fleiri sem þekkingu hafa og reynslu í þessum málaflokki. Jafnframt mun Reykjanesbær kaupa 2,5% hlut í Geysi Green Energy.

Geysir Green Energy var stofnað í janúar á þessu ári. Fyrirtækið mun einbeita sér að tækifærum í nýtingu jarðvarma, fjárfestingum í þróun og byggingu jarðvarmaorkuvera, annast yfirtöku á jarðvarmaorkuverum í eigu orkufyrirtækja og taka þátt í einkavæðingu orkufyrirtækja þar sem tækifæri gefast. Höfuðstöðvar fyrirtækisins verða í Reykjanesbæ.