Vill að þingið rannsaki okurlánastarfsemi

Jóhanna Sigurðardóttir, þingmaður Samfylkingarinnar, vill að skipuð verði þingnefnd til að rannsaka okur á Íslandi. Hún segir slíka rannsókn nauðsynlega í ljósi ofsagróða bankanna, okurvaxta á útlánum og hárra þjónustugjalda. Jóhanna lét þessi orð falla í þættinum Silfri Egils í umræðu um góða afkomu bankanna.

Jóhanna Sigurðardóttir vísar til þess að sextíu til sjötíu tillögur um þingnefndir hafi verið felldar meðan náðst hafi þverpólitísk samstaða um slíka nefnd árið 1955 til að rannsaka okurlánastarfsemi í Reykjavík. Það er í eitt af þremur skiptum sem 39. ákvæði stjórnarskrárinnar, um að þingmenn skipi sjálfstæðar rannsóknarnefndir, hefur verið beitt en engin dæmi eru um það eftir miðjan sjötta áratuginn.

Jóhanna Sigurðardóttir segir að ofsagróði bankanna, sem hafi verið seldir á undirverði til einkaaðila, veki upp spurningar. Græðgin sé yfirgengileg en viðskiptavinir bankanna sitji eftir og njóti þess ekki í lægri útlánsvöxtum og þjónustugjöldum.

Jóhanna segir margt annað í starfsemi bankanna vekja áleitnar spurningar, til að mynda hvernig bankarnir hindri virka samkeppni með uppgreiðslugjaldi og skilyrtum kjörum.