Tók skýrslu af stúlkum sem numdar voru á brott

Lögreglan á Húsavík tók í dag skýrslur af stúlkunum þremur í Laugaskóla, sem teknar voru nauðugar úr rúmum sínum aðfararnótt föstudags á heimavist skólans. Farið var með stúlkurnar í hús í nágrenninu og samkvæmt því sem fram kemur á bloggsíðum nemenda var einni þeirra stungið ofan í klósett.

Þá var þeim troðið í farangursgeymslu bifreiðar og þær fluttar þannig milli húsa. Ein þeirra er sögð marin eftir átökin. Það voru skólafélagar stúlknanna sem beittu þær valdi en þeir voru með athæfinu að svara hrekk þar sem stúlkurnar höfðu komið fyrir þorskhausum í herbergjum drengjanna.

Líklegt er að drengirnir verði ákærðir hvort sem stúlkurnar kæra með beinum hætti eða ekki. Meðal annars er til rannsóknar hvort blyðgunarsemi stúlknanna hafi verið særð auk annarrar niðurlægingar sem þær mættu. Heimildir fréttastofu herma að sjálf vilji fórnarlömbin gera sem minnst úr málinu.