Of lítill stuðningur í baráttunni við stera

Birgir Guðjónsson, læknir og meðlimur í lyfjanefnd Alþjóðafrjálsíþróttasambandsins, segir að stjórnvöld hafi of lítið stutt við baráttu gegn misnoktun stera hér á landi.

Eins og fram kom í gær lagði fíkniefnalögreglan hald á meira en 30 þúsund skammta af sterum í fyrradag og handtók vegna þess máls einn af frammámönnum Kraftlyftingarsambandsins.

Birgir segir að þessi innflutningur megi gjarnan varða við fíkniefnalöggjöfina en í dag varðar hann við lyfjalög og refsing vegna brota á þeirri löggjöf er ekki eins þung.

Birgir segir að misnotkun á sterum í tenglsum við kraftaíþróttir sé þekkt og vitað að efnin hafi verið aðgengileg á líkamsræktarstöðvum. Í öðrum löndum sé víða tekið mun harðar á þessum málum en hér og telur hann að stjórnvöld hafi verið of treg til að bregðast við ábendingum um vandann.

Steranotkun getur haft mjög skaðleg líkamleg áhrif, einkum á hjarta og æðakerfi. Birgir nefnir einnig að notkunin geti haft geðræn áhrif og aukið árásargirni.