Príla upp húsveggi til þess að komast í pott að næturlagi

Stór heitur pottur, sem er utan dyra á þriðju hæð húsnæðis líkamsræktarstöðvar í Spönginni í Grafarvogi, er orðinn vinsæll samkomustaður unglinga í hverfinu, að næturlagi.

Frá þessu greindi sextán ára stúlka, sem lögregla greip á hlaupum af vettvangi í nótt, en vinir hennar hurfu út í náttmyrkrið. Svo mikil er þörf unglinganna fyrir að lauga sig að þeir leggja sig í hættu við að príla upp húsveggi og alveg upp á þak til að komast í pottinn.

Þrá ungmenna til heitra baða er ekki alveg nýlunda því á árum áður var vinsælt að klifra yfir grindverk Vesturbæjarlaugarinnar að næturlagi og fara í gegnum girðingu laugarinnar í Mosfellsbæ en það var fyrir tíma eftirltismyndavéla.