Skotar aldrei ofar á lista FIFA

Skoska landsliðið í knattspyrnu er í 13. sæti á styrkleikalista FIFA sem birtur var í morgun og hefur aldrei verið ofar á listanum frá því hann var fyrst birtur árið 1993.

Skotarnir fylgdu eftir slæmu 2-0 tapi fyrir Georgíu með því að skella Úkraínumönnum 3-1 og eiga nú ekki langt í land með að ná grönnum sínum Englendingum á FIFA listanum.

Þó FIFA-listinn sé frekar umdeilt fyrirbæri er hann ekki með öllu ómerkilegur, því hann ræður miklu um það hvernig lið raðast í styrkleikaflokka fyrir undankeppni HM 2010. Fari svo að Skotarnir haldi sama dampi í næstu landsleikjum er ljóst að liðið verði í öðrum styrkleikaflokki fyrir HM - upp úr fjórða styrkleikaflokki sem liðið var í fyrir undankeppni EM nú.