Newcastle hélt jöfnu gegn Arsenal

Newcastle tók á móti Arsenal í ensku úrvalsdeildinni í kvöld í frestuðum leik úr annarri umferð. Liðin skildu jöfn, 1-1, með mörkum Emmanuel Adebayor og Steven Taylor.

Mathieu Flamini og Alexander Hleb eru frá vegna meiðsla og þeirra stöður í liði Arsenal tóku þeir Gilberto og Eduardo. Hjá Newcastle á Abdoulaye Faye við meiðsli að stríða en varnarmaðurinn Steven Taylor var mættur á nýjan leik eftir að hafa jafnað sig á sínum meiðslum.

Leikurinn var ekki nema fjögurra mínútnu gamall þegar Emmanuel Adebayor skoraði fyrsta mark leiksins eftir fyrirgjöf nafna síns Eboue. Adebayor tók sendinguna niður, lagði boltann fyrir sig og skoraði með glæsilegri spyrnu.

Newcastle reyndi að svara fyrir sig um hæl en skalli Geremi fór framhjá marki Arsenal aðeins mínútu eftir að Adebayor skoraði.

Heimamenn létu þó mark Arsenal ekki slá sig út af laginu og spiluðu vel sín á milli. En Arsenal átti sínar stórhættulegu sóknir inn á milli.

Steven Taylor komst nálægt því að jafna metin er skalli hans jafnaði í stönginni um miðbik fyrri hálfleiks.

Staðan var þó enn 1-0 þegar flautað var til hállfeiks en það entist í aðeins fimmtán mínútur.

Leikmenn Arsenal reyndu að forða boltanum frá hættusvæði sínu sem endar með því að Eduardo tapar boltanum. Habib Beye gaf fyrir inn á vítateig þar sem Alan Smith fleytir boltanum áfram á Taylor sem skilar knettinum í markið.

Arsenal reyndi að sækja sigurinn á lokamínútunum en allt kom fyrir ekki. Undir lok leiksins fékk reyndar Newcastle fjórar hornspyrnur í röð en ekkert kom úr þeim.

Niðurstaðan var hins vegar vel ásættanleg fyrir heimamenn og er sjálfsagt enginn ánægðari en Sam Allardyce, stjóri Newcastle.

Arsenal gefur hins vegar eftir í toppbaráttunni en er enn með fjögurra stiga forystu á toppi deildarinnar.

Newcastle er með nítján stig og situr í ellefta sæti.