Annað tap svo Tómas og fé­lagar fara í Evrópudeildina

Hearts var með bakið upp við vegg fyrir leik kvöldsins í Edinborg eftir slæmt 4-0 tap í fyrri leik einvígisins í Austurríki.

Tómas Bent spilaði lokakafla leiksins í Graz en sat allan tímann á bekknum í kvöld.

Ekki var útlit fyrir að Hearts kæmi til baka í leik kvöldsins en markalaust var í hléi. Hearts var meira með boltann en komst lítt áleiðis í sóknaraðgerðum sínum á meðan Sturm Graz var hættulegra með snörpum sóknum.

Simon Seidl kom Sturm Graz yfir á 64 mínútu og aðeins fjórum mínútum síðar tvöfaldaði Emran Soglo forystuna. Leiknum lauk 2-0 og einvíginu 6-0 fyrir Sturm Graz.

Sturm Graz fer því áfram í næstu umferð í undankeppni Meistaradeildarinnar. Þar mætir austurríska liðið annað hvort Fenerbahce frá Tyrklandi eða Górnik Zabrze frá Póllandi. Þau eigast við í Póllandi annað kvöld en Fenerbahce vann fyrri leikinn 1-0 heima fyrir.

Vegna tapsins í einvígi kvöldsins færist Hearts yfir í Evrópudeildina. Þar mætir liðið sigurvegaranum úr einvígi St. Gallen frá Sviss og Benfica frá Portúgal.

St. Gallen leiðir einvígið óvænt 2-1 eftir fyrri leikinn en liðin eigast við öðru sinni á Leikvangi ljóssins í Lissabon á fimmtudagskvöld.