128 milljarða leikur

Flestir reikna með því að Englendingar komist áfram í undankeppni EM á næsta ári þar sem liðinu nægir jafntefli gegn Króötum í kvöld til að tryggja sér farseðilinn þangað. Fari hinsvegar allt á versta veg fyrir enska liðið, er talið að það muni kosta breska þjóðarbúið um milljarð punda.

Sigur Ísraela á Rússum um síðustu helgi var því gríðarlega mikilvægur, því hann þýðir að enska liðið er í þægilegri stöðu í dag - ólíkt því sem var fyrir helgina þegar útlit var fyrir að liðið sæti eftir í E-riðlinum.

Króatar eru í efsta sæti riðilsins fyrir lokaleikina í dag með 26 stig og eru öruggir áfram. Englendingar koma næstir með 23 stig og Rússar hafa 21 stig. Rússar eiga eftir formsatriði gegn Andorra í kvöld (lið sem hefur ekki unnið leik og skorað tvö mörk í undankeppninni) og því verða enskir að ná í stig á Wembley í kvöld.

Breska blaðið Daily Telegraph fullyrðir að ef svo óíklega vildi til að enska liðið sæti eftir í riðlinum, myndi það þýða að þjóðarbúið yrði af um einum milljarði punda í tekjur af þáttöku sinni á EM.

Þetta eru tölur sem byggðar eru á vísindalegum rannsóknum sem gerðar voru á EM 2004 og HM 2006. Þessi tölfræði inniheldur m.a. tekjur sem koma inn í kassan hjá veðbönkum, verslunum og ekki síst sjónvarpsstöðvunum.

Þess má að lokum geta til gamans að hátt í 300 milljörðum króna var eytt í bjórauglýsingar einar saman í síðustu heimsmeistarakeppni í knattspyrnu og það gefur kannski góða mynd af þeim gríðarlegu fjármunum sem eru í spilinu í kring um mót á borð við þessi.