Auðveldara að mæta sterkum liðum

Dimitar Berbatov segist vonast til þess að Búlgaría muni fá sterka andstæðinga í undankeppni fyrir heimsmeistaramótið 2010. Ljóst er að Búlgaría verður ekki með á Evrópumótinu á næsta ári.

„Það er auðveldara að leika gegn stóru liðunum. Þau leyfa manni að spila fótbolta og maður er mun afslappaðri því það er engu að tapa," sagði Berbatov sem skorað hefur 38 mörk í þeim 60 landsleikjum sem hann á að baki.

Búlgarska landsliðið leikur gegn Slóveníu á morgun en þegar er ljóst að það mun enda í þriðja sæti í G-riðli undankeppni EM.