Pétur Pétursson: Vitum allt um danska liðið

Pétur Pétursson var léttur í skapi á blaðamannfundinum fyrir leik Dana og Íslendinga í dag og ljóst að hann nýtur sín vel í nýju hlutverki sem aðstoðarþjálfari landsliðsins.

"Mér lýst mjög vel á þetta og þetta er búin að vera mjög skemmtilegur tími í Köben," sagði Pétur sem hefur ekki áhyggjur að Morten Olsen, þjálfari danska landsliðsins komi þeim félögum á óvart í leiknum.

"Við vitum nánast allt um danska liðið. Við vitum ekki sjálfum sér hvernig hann stillir nákvæmlega upp í þessum síðasta leik og hann gæti gert einhverjar breytingar. Við vitum allt um hvernig danska liðið hefur verið að spila í öllum þessum leikjum til þessa í keppninni," segir Pétur og bætir við.

"Veikleikarnir hjá Dönum hafa verið í vörninni og okkur finnst það báðum mér og Óla. Þetta eru frábærir fótboltamenn. Þeir hafa spilað vel á móti okkur í síðustu leikjum og Danir áttu mjög góðan fyrri hálfleik í leiknum á Laugardalsvellinum. Þeir spiluðu þá frábæran fótbolta og við vonumst til þess að geta lokað á það á morgun," segir Pétur sem gerir vonir um jafntefli en dreymir um sigur.

"Væntingar mínar eru að við löbbum ekki útaf vellinum með tap. Það væri æðislegt að ná fyrsta sigrinum gegn Dönum. Þú ferð út á fótboltavöll til þess að reyna að vinna leikinn, þannig er það og hefur alltaf verið," sagði Pétur.