Wenger tippar á fimm manna miðju

Arsene Wenger, stjóri Arsenal, segist reikna með að Steve McClaren tefli fram fimm manna miðju á miðvikudagskvöldið þegar Englendingar mæta Króötum í lokaleik sínum í riðlakeppni EM.

Enska liðið verður án framherjanna Wayne Rooney og Michael Owen í leiknum og flestir reikna með því að það muni koma í hlut Peter Crouch að spila einn í framlínunni með þá Steven Gerrard, Frank Lampard og Gareth Barry á miðri miðjunni.

Wenger hallast einnig að því að McClaren muni velja David Beckham á hægri kantinn í stað Shaun Wright-Phillips til að hlaða lið sitt reynslu.

"Hann mun örugglega skipta um leikaðferð," sagði Wenger, en enska landsliðið hefur venjulega spilað leikaðferðina 4-4-2. "Það er mikilvæg ákvörðun því ég held að það sé besta leiðin fyrir liðið til að vera þétt varnarlega án þess að missa of mikið af púðri í sóknarleiknum. Reynslan vegur þar þungt og ég tel að hann muni notast við Barry, Lampard, Gerrard og Beckham," sagði Wenger. Þá kemur væntanlega í hlut Joe Cole að sjá um vinstri vænginn.

"Ég veit að England spilar venjulega 4-4-2 en ég held að verði gerðar breytingar á miðvikudaginn og ég spái Englendingum 2-0 sigri. Það myndi skila liðinu í toppsætið í riðlinum og þá getur enginn talað um að Englendingar hafi spilað undir getu," sagði Frakkinn.