Risar berjast um Riquelme

Líklegt er talið að argentínski miðjumaðurinn Juan Roman Riquelme færi sig um set þegar félagaskiptaglugginn opnar í janúar. Hann er hjá spænska liðinu Villareal en hefur átt í útistöðum við Manuel Pellegrini, þjálfara liðsins.

Þessi 29 ára leikmaður skoraði tvö mörk fyrir Argentínu í sigri á Bólivíu um síðustu helgi. Talið er að Real Madrid sé með hann á sínum óskalista en það sama á við um ítölsku liðin Inter og Juventus.

Roberto Mancini, þjálfari Inter, er að leita að leikmanni til að leysa af Luis Figo sem er meiddur og þar að auki á lokahluta ferils síns. Riquelme var næstum genginn til liðs við Atletico Madrid fyrir sex milljónir punda síðasta sumar en verðmiðinn á honum er talinn svipaður í dag.

Talið er líklegra að Riquelme gangi til liðs við Inter eða Real Madrid heldur en Juventus. Ástæða þess er sú að þau félög hafa í dýpri vasa að grafa en Juventus.