Healy stoltur af markametinu

Norður-írski framherjinn David Healy sló á laugardaginn 12 ára gamalt markamet Króatans Davor Suker þegar hann skoraði 13. mark sitt í undankeppni EM og tryggði Norður-Írum sigur á Dönum á Windsor Park.

Sigurmark Healy þýðir að Norður-Írar eiga enn fræðilega möguleika á að komast á EM, en til þess þarf liðið að leggja Spánverja á miðvikudaginn og vona að Svíar tapi um leið fyrir Lettum. Healy er í skýjunum yfir markametinu og hefur miklar mætur á Davor Suker.

"Að slá þetta met með marki sem heldur okkur í voninni um að komast á EM er auðvitað hlutur sem mann dreymir varla um að gera á ferlinum. Ég man eftir því að hafa horft á Suker spila fyrir nokkrum árum og hversu frábær leikmaður hann var. Þetta er svipuð tilfinning og þegar ég skoraði níunda markið mitt fyrir þjóð mína og jafnaði við George Best. Ég man að ég hugsaði með mér ´af hverju er verið að minnast á mig í sömu andrá og George Best' " sagði Healy ánægður.