Endurskoða löggjöf ef dómur í tálbeitumáli verður staðfestur

Það var Ágúst Ólafur Ágústsson, varaformaður Samfylkingarinnar, sem gerði dóm héraðsdóms í Kompásmálinu að sínu umtalsefni. Þar voru þrír menn sýknaðir af ákæru um kynferðisbrot fyrir að hafa ætlað að fara á fund unglingsstúlku með það í huga að eiga við hana kynferðislegt samneyti. Benti Ágúst Ólafur á dómurinn hefði komist að því að netsamskipti við þáttagerðarmenn Kompáss gætu ekki verið sönnun um brot.

Benti hann á að þarna væri ekki um fullframið en samkvæmt hegningarlögum væri tilraun til brots einnig refsiverð. Vísaði hann þar til tilraunaákvæðis laganna. Spurði hann dómsmálaráðherra hvort hann hygðist beita sér fyrir skýrari refsiheimildum um nettælingu gagnvart börnum í kynferðislegum tilgangi.

Björn Bjarnason dómsmálaráðherra vísaði til greinar sem hann ritaði í Morgunblaðið í sumar. Þar hefði hann sagt að kæmi í ljós að refsiheimildir í málum sem þessum væru ekki fyrir hendi þyrfti að bregðast við því og endurskoða lögin. Fram hefur komið að málinu hafi verið áfrýjað til Hæstaréttar og sagði Björn rétt að bíða þess dóms áður en ákvörðun um endurskoðun yrði tekin.

Þá sagði Björn að þessi mál hefðu verið rædd á fundi dómsmálaráðherra norrænu ríkjanna í sumar og það yrði einnig gert á fundi þeirra í desember.