Hjálpaðu okkur, Yossi

Þeir Peter Crouch og Steven Gerrard hafa beðið félaga sinn Yossi Benayoun hjá Liverpool um að gera sitt besta til að hjálpa Ísraelum að leggja Rússa að velli á heimavelli þann 17. nóvember.

Vonir enska landsliðsins um sæti á EM næsta sumar hanga á því að Ísraelar hirði stig af Rússunum í E-riðli. Rússar eiga eftir að spila við Andorra og Ísrael í riðlakeppninni og er leikurinn við Andorra aðens forgangsatriði.

"Við Steve erum búnir að hamast á honum og reyna að koma honum í réttan gír fyrir leikinn við Rússa. Vonandi stendur hann sig vel í leiknum," sagði Crouch á heimasíðu Liverpool. "Það væri frábært fyrir hann að verða hetja Englendinga líkt og hann er nú orðinn hetja stuðningsmanna Liverpool."

Króatar eru í efsta sæti E-riðils og nægir stig gegn Makedóníu í næsta leik til að tryggja sér farseðilinn á EM. Lokaleikur liðsins er svo við Englendinga.

Benayoun átti skínandi leik þegar Liverpool valtaði yfir Besiktas 8-0 í Meistaradeildinni í fyrrakvöld og skoraði þá þrennu.