Tilkynnt um nýjan landsliðsþjálfara í dag

Geir Þorsteinsson, formaður Knattspyrnusambands Íslands, sagðist í Morgunútvarpinu á Rás 1 gera ráð fyrir að tilkynnt yrði um ráðningu nýs landsliðsþjálfara í dag.

Þrír menn hafa helst verið nefndir sem mögulegir arftakar Eyjólfs Sverrissonar. Þeir Guðjón Þórðarson, þjálfari Skagamanna, Willum Þór Þórsson, þjálfari Vals og Ólafur Jóhannesson, fyrrum þjálfari FH.

Samningur við Eyjólf Sverrisson rennur út á miðvikudaginn. Stjórn KSÍ hafði ekki áhuga á að endurnýja samninginn þótt Eyjólfur hafi lýst yfir vilja sínum til þess.