Bjarni kom ekki til greina

Landsliðsnefnd KSÍ mun koma saman í kvöld eða á morgun þar sem ráðning landsliðsþjálfara verður efst á baugi.

Eyjólfur Sverrisson er hættur sem þjálfari íslenska landsliðið en samningur hans rann út fyrir síðasta leikinn í undankeppni EM sem er útileikur gegn Dönum í næsta mánuði.

Eins og fram kom hér á Vísi vildi Eyjólfur ekki taka að sér að stýra liðinu gegn Dönum nema KSÍ gerði við hann áframhaldandi samning, en það vildi sambandið ekki.

Þegar svona staða kemur upp er ekki óalgengt að aðstoðarmönnum þjálfara sé falið að stýra liðum þar til eftirmaður finnst, en það kom ekki til greina hjá KSÍ að þessu sinni.

Bjarni Jóhannsson, aðstoðarmaður Eyjólfs, hefur þar með lokið störfum með landsliðinu rétt eins og Eyjólfur.

"Bjarni tilheyrir sveit Eyjólfs Sverrissonar. Það er landsliðsþjálfarinn sem fær hann til sín sem aðstoðarmann og hann var með samning um að aðstoða Eyjólf, svo það er auðvitað bara búið. Ég veit ekki hvort einhver annar þjálfari vill hafa hann sem aðstoðarmann en almennt er það þannig að starfi aðstoðarmanna er lokið þegar þjálfarinn hættir," sagði Geir Þorsteinsson, formaður KSÍ í samtali við Vísi í dag.

Við spurðum Geir hvort KSÍ hefði rætt eitthvað við Bjarna. Hann segir það vera á ábyrgð Eyjólfs Sverrissonar. "Það er Eyjólfur sem sér um sitt lið."

Bjarni vildi ekki tjá sig um málið þegar Vísir náði tali af honum í dag.

Sá orðrómur hefur verið á kreiki í dag að þeir Ólafur Jóhannesson, fyrrum þjálfari FH og Leifur Garðarsson, þjálfari Fylkis, séu inni í myndinni hjá KSÍ sem næstu landsliðsþjálfarar.

"Þetta er áhugaverð saga, en því miður er ekki að marka staf í henni," sagði Ólafur í samtali við Vísi og sagðist ekkert hafa heyrt frá KSÍ.

Ólafur hefur oftast verið nefndur til sögunnar sem næsti landsliðsþjálfari ásamt þeim Willum Þór Þórssyni þjálfara Vals og Guðjóni Þórðarsyni, þjálfara Skagamanna.