Ólafur með samningstilboð frá Brann

Ólafur Örn Bjarnason er með í höndunum samningstilboð frá Brann til næstu tveggja ára.

Samningur Ólafs við Brann rennur út í lok tímabilsins og hefur til að mynda Molde mikinn áhuga á Ólafi. Kjell Jonevret, þjálfari Molde, var á leik Brann og HSV í UEFA-bikarkeppninni í gær til að fylgjast með Ólafi.

„Við höfum boðið honum tveggja ára samning. Nú er þessari viku að ljúka, svo sjáum við hvað gerist í næstu viku."

Ólafur sagði í samtali við norska fjölmiðla að hann ætlaði að ræða við þjálfara Brann áður en hann ákveður sig.

„Þetta yrði væntanlega síðasti samningur minn áður en ég færi aftur heim til Íslands. Ég er þess vegna að velta fyrir mér hversu mikið ég fengi að spila hér þessi síðustu ár. Ég veit að ég get hvergi bókað byrjunarliðssæti en ég vil ræða við þjálfarann og vita hvað hann er að hugsa."