Gagnrýna Eyjólf harðlega

Þrír af íslensku landsliðsmönnunum í knattspyrnu gagnrýna Eyjólf Sverrisson landsliðsþjálfara harðlega í grein sem norska netmiðilinn Nettavisen birtir í dag um ástandið á íslenska landsliðinu.

Þeir Gunnar Heiðar Þorvaldsson hjá Valerenga, Indriði Sigurðsson hjá Lyn og Ólafur Örn Bjarnason hjá Brann láta allir skoðun sína í ljós í greininni og ef marka má ummæli þeirra hafa þeir gefist upp á landsliðsþjálfaranum eins og þorri stuðningsmanna liðsins.

"Ég veit að margir af landsliðsmönnunum vilja breyta til og vilja fá útlendan þjálfara sem sér hlutina öðruvísi," sagði Indriði. "Allir leikmennirnir eru sammála um að árangur liðsins sé alls ekki viðunandi."

Gunnar Heiðar Þorvaldsson segir að úrslitin í síðustu leikjum tali sínu máli. "Við eigum auðvitað að fara létt með að vinna þjóðir eins og Liechtenstein og þegar við töpum 3-0 fyrir liði á borð við Liechtenstein tala úrslitin sínu máli. Þar voru leikmenn einfaldlega ekki klárir á sínum hlutverkum í liðinu. Það búa 300,000 manns á Íslandi og við eigum að geta teflt fram frambærilegu liði," sagði Gunnar Heiðar.

Ólafur Örn Bjarnason segir íslenska liðið búið að vera upp og niður undanfarið en að síðustu tvö ár hafi meira og minna legið niður á við. "Við erum búnir að vera lélegir í tvö ár þannig að menn verða að fara að hugsa sinn gang. Hér áður unnum við alltaf lið eins og Letta," sagði Ólafur og sagðist setja spurningamerki við það hvort Eyjólfur væri rétti maðurinn til að stýra liðinu.

Markvörðurinn Árni Gautur Arason var eini leikmaðurinn sem Nettavisen talaði við sem tók upp hanskann fyrir landsliðsþjálfarann. "Ég er ekki ósáttur við Eyjólf og tel ekki að það sé hann sem á að fá skammirnar. Ég held að það séu frekar leikmennirnir sem þurfa að skoða sín mál," sagði Árni.