Samantekt: Undankeppni EM í kvöld

Fjöldi leikja fór fram í undankeppni EM í kvöld þar sem hæst bar stórtap íslenska landsliðsins í Liechtenstein. Skotar misstu af gullnu tækifæri til að tryggja sér sæti á EM með 2-0 tapi gegn Georgíu.

Í A-riðli voru þrír leikir í kvöld. Þar eru Pólverjar á toppnum með 24 stig en Portúgalar héldu öðru sætinu með 2-1 sigri á Kasakstan í kvöld og hafa 23 stig. Serbar halda þriðja sætinu eftir 6-1 sigur á Aserum og þá unnu Belgar 3-0 sigur á Armenum.

Í B-riðli vann Úkraína 5-0 sigur á Færeyjum þar sem Kalinchenko skoraði þrennu. Georgía vann nokkuð óvæntan sigur á Skotum 2-0 og á sama tíma unnu Frakkar 2-0 sigur á Litháum og skutust í efsta sætið. Thierry Henry skoraði bæði mörk Frakka og er orðinn markahæsti franski landsliðsmaðurinn frá upphafi. Það var Michel Platini sem átti gamla markametið.

Frakkarnir eru í toppsætinu með 25 stig eftir 11 leiki, Skotar hafa 24 stig í öðru sæti eftir 11 leiki og Ítalar hafa 23 stig í þriðja sætinu eftir 10 leiki. Skotar eiga leik við Ítalíu á heimavelli í lokaleiknum sínum í riðlinum.

Í C-riðli tryggðu Evrópumeistarar Grikkja sér sæti á EM í kvöld með góðum 1-0 útisigri á Tyrkjum. Grikkir hafa hlotið 25 stig og Norðmenn eru í öðru sæti með 20 stig eftir 2-0 sigur á Bosníu í kvöld. Tyrkir eru í þriðja sætinu með 18 stig.

Í D-riðli eru Tékkar og Þjóðverjar búnir að tryggja sér sæti á EM. Þjóðverjar töpuðu 3-0 heima fyrir Tékkum í kvöld, en voru þegar öruggir áfram. Tékkarnir tryggðu sér með sigrinum sæti á EM og hafa báðar þjóðir 23 stig í efsta sætinu.

Wales vann nauman 2-1 útisigur á San Marion og lítill glæsibragur á spilamennskunni þar á bæ um þessar mundir - liðið í næstneðsta sæti með aðeins 13 stig. Írar eru í þriðja sæti með 16 stig eftir 1-1 jafntefli við Kýpur.

Í E-riðli voru tveir leikir í kvöld. Englendingar töpuðu fyrir Rússum 2-1 á útivelli og Makedónía vann Andorra 3-0. Króatar eru í efsta sæti með 26 stig, Englendingar hafa 23 í öðru sæti og Rússar í þriðja með 21 stig - en Rússar og Króatar eiga leik til góða á enska liðið.

Í F-riðli okkar Íslendinga eru Svíar í efsta sæti með 23 stig eftir 1-1 jafntefli við Norður-Íra á heimavelli í kvöld. Spánverjar eru í öðru sæti með 22 stig og Danir og Norður-Írar hafa 17 stig. Danir lögðu Letta 3-1 á heimavelli í kvöld.

Þá þarf fáum orðum að fara um 3-0 tap íslenska landsliðsins gegn Liechtenstein í riðlinum og nú munar aðeins einu stigi á botnliði Liechtenstein og því íslenska. Ef Liechtenstein nær að leggja Lettland í lokaleiknum og Ísland tapar fyrir Danmörku - gæti farið svo að íslenska liðið ræki lestina í riðlinum.

Í G-riðli tryggðu Rúmenar sér sæti á EM með 2-0 útisigri á Luxemburg og hafa 26 stig í efsta sæti riðilsins. Hollendingar eru í öðru sæti þar með 23 stig eftir 2-0 sigur á Slóvenum, en Búlgarar þurftu að gera sér að góðu 1-1 jafntefli við Albaníu á útivelli og er liðið því í þriðja sætinu með 19 stig.