McClaren: Við erum í slæmri stöðu

Steve McClaren landsliðsþjálfari Englendinga hafði engin svör við tapi hans manna gegn Rússum í undankeppni EM í kvöld. Tap enska liðsins þýðir að örlög liðsins eru nú í höndum Rússa og sæti á EM skyndilega í mikilli hættu.

"Við höfðum þetta í okkar höndum en töpum svo leiknum. Ég hef áður séð svona leiki og það er ekki hægt að útskýra hvað gerist. Nú erum við komnir í slæma stöðu og þurfum að treysta á að Rússum verði á í messunni," sagði McClaren.

Hann var mjög ósáttur við vítaspyrnudóminn umdeilda sem gaf rússneska liðinu jöfnunarmarkið. "Ég er búinn að sjá endursýningu á vítaspyrnudómnum og það er til skammar að maðurinn skuli hafa dæmt vítaspyrnu á þetta. Brotið á sér stað fyrir utan teig og aðstoðardómarinn dæmdi ekki neitt. Svona hlutir geta snúið leikjum," sagði þjálfarinn.

McClaren segir að þó staða Rússa sé vænleg - eigi þeir enn eftir að leggja Ísraela. "Rússarnir eiga enn eftir að fara til Ísrael og ná sigri og það er ekki auðvelt. Þeir eiga erfitt verkefni fyrir höndum ef þeir ætla áfram," sagði McClaren.