Eyjólfur: Ekki kominn í þrot með landsliðið

Eyjólfur Sverrisson (ES) sagði í viðtali við Sýn eftir leik að hann væri ekki kominn í þrot með íslenska landsliðið þrátt fyrir 3-0 tap í Liechtenstein.

Guðmundur Benediktsson (GB), íþróttafréttamaður á Sýn, ræddi við Eyjólf eftir leikinn.

„Við vorum niðurlægðir," sagði Eyjólfur. „Við erum hrikalega daprir vegna þessa, þetta var með ólíkindum. Við fengum á okkur þrjú mörk á móti Liechtenstein. Sjálfir fengum við fjögur dauðafæri sem við nýttum ekki. Það er bara einfaldlega þannig að við vorum ekki að spila nógu vel í dag. Við vorum ekki nógu þéttir, ekki að spila sem lið og það þarftu að gera til að ná árangri."

Vorum mjög vel undirbúnir

GB: Vorum við ekki nægilega vel undirbúnir fyrir leik Liechtenstein?

ES: Jú, við vorum mjög vel undirbúnir. Það hefur hins vegar sýnt sig í lekjum þar sem við þurfum að stjórna spilinu meira og teljum okkur þurfa að sækja, þá fer allt í lás. Það er það sem gerðist í dag.

Um leið og við fáum á okkur mark fer allt úrskeðis. Þetta er eitthvað sem við höfum verið að berjast við síðustu fimm árin.

Við eigum tvo góða leiki í röð og svo eigum við slæma leiki. Þessi vörn stóð sig mjög vel á móti Spánverjum og Norður-Írum. Við þurfum að finna meiri stöðugleika. Það hefur ekki gerst síðustu fimm árin.

Verðum rassskelltir þegar við þurfum að sækja

GB: Var farið sérstaklega yfir varnarleikinn? Eftir leikinn gegn Lettum á laugardaginn fengum við á okkur fjögur mörk á heimavelli. Hér fáum við á okkur þrjú mörk gegn Liechtenstein sem er dvergríki í knattspyrnu.

ES: Já, já. Á móti Lettum fengum við mörk á okkur úr föstum leikatriðum. Þar voru menn ekki nægilega einbeittir. Það er visst agaleysi því menn þurfa að vera á tánum í föstum leikatriðum.

Í dag fáum við á okkur skyndisóknir. Við verðum að hindra þetta. Það virðist vera þannig að þegar við erum þéttir, þegar við erum allir að verjast á okkar vallarhelmingi, náum við góðum úrslitum. Um leið og við þurfum að færa okkur aðeins framar á völlinn verðum við yfirleitt rassskelltir.

Allt liðið í baklás

GB: Þú telur þig ekki vera kominn í þrot með þetta lið?

ES: Nei, ég er ekki kominn í þrot með þetta lið. Framundan er þessi vinna að fá stöðugleika í liðið. Þetta er liðið sem spilaði frábærlega á móti Spánverjum og Norður-Írum. Það fór allt í baklás í dag. Það er með ólíkindum. Það verður að stoppa í það.

Hugarfarið var mjög gott

GB: Var hugarfarið slæmt?

ES: Hugarfarið fyrir þennan leik var mjög gott, alveg eins og fyrir leikina gegn Spánverjum og Norður-Írum. En um leið og við þurfum að sækja á fleiri mönnum lendum við alltaf í vandræðum.

Hermann vildi klára leikinn sjálfur

GB: Mér fannst Hermann Hreiðarsson oft spila úr stöðu þannig að þeir fóru trekk í trekk upp hægri vænginn í fyrri hálfleik. Hvernig stóð á því?

ES: Ég held að Hermann hafi viljað gera of mikið. Hann setti of mikið á sínar herðar. Hann ætlaði að klára leikinn fyrir allt liðið. Það gerir enginn maður. Við verðum að gera þetta saman sem lið. Við fórum yfir þetta í hálfleik. Þetta er hluti af vandamálinu, menn ætla sér of mikið.

Gaf mönnum nokkrar mínútur

GB: Þú gerðir enga skiptingu í leikhlé, af hverju beiðstu með þær?

ES: Við vildum sjá hverjir ætluðu sér að spila þennan leik almennilega. Ég sagði þeim í hálfleik að þeir hefðu nokkrar mínútur til að sýna þann vilja.