Heimir Guðjóns: Eyjólfur er kominn á endastöð

"Það er bara almennt metnaðarleysi í gangi - alveg sama hvort það er hjá þjálfara eða hjá leikmönnum - menn virðast ekki hafa metnað til að gera góða hluti," sagði Heimir Guðjónsson, þjálfari FH þegar Vísir náði tali af honum eftir 3-0 tap Íslands í Liechtenstein í kvöld.

"Það var mikið agaleysi inni á vellinum og menn virtust bara ekki vera tilbúnir í að rífa sig upp eftir þessi skelfilegu úrslit á móti Lettum. Það virðist eitthvað mikið vera að í þessu landsliði, þó ég sjái auðvitað bara það sem gerist inni á vellinum," sagði Heimir.

"Maður hlýtur að spyrja sig þeirrar spurningar hvort Eyjólfur sé ekki kominn á endastöð með þetta landslið. Forsendan fyrir því að spila fótbolta hlýtur að vera sú að mönnum líði vel á boltanum en við náum ekki að stýra leikjum af því liðið er ekki nógu gott á boltanum."

"Í leiknum í dag var t.d. allt of mikið um háar sendingar og leikmennirnir voru allt of óþolinmóðir strax frá byrjun í stað þess að sýna þessu verkefni smá þolinmæði og reyna að vinna sig hægt og bítandi inn í leikinn," sagði Heimir.

Hann er ekki bjartsýnn á að Eyjólfur Sverrisson verði mikið lengur með liðið.

"Eyjólfur klárar þessa keppni auðvitað en þegar keppninni lýkur hljóta menn að setjast niður og skoða hvert þetta landslið er að stefna, og á miðað við gengi liðsins í síðustu leikjum sýnist mér það bara vera niður á við. Þetta snýst allt um árangur og hann er bara ekki nógu góður."

Heimir tekur í sama streng og aðrir sérfræðingar í kvöld þegar hann segist ekki muna eftir annari eins útreið og íslenska liðið fékk í kvöld.

"Þetta var svartur dagur í íslenskri knattspyrnu eins og Guðmundur Benediktsson sagði réttilega í útsendingunni í kvöld. Ég er nú búinn að vera lengi í þessu en ég man ekki eftir annari eins útreið frá íslenska liðinu frá liði í þessum klassa."