Rússar lögðu Englendinga

Staða Englendinga í undankeppni EM versnaði til muna í dag þegar liðið tapaði 2-1 fyrir Rússum í dramatískum leik á gervigrasinu í Moskvu. Wayne Rooney kom enska liðinu yfir eftir hálftíma leik, en tvö mörk frá heimamönnum í síðari hálfleik þýða að nú þarf allt að ganga enska liðinu í hag ef það á að komast á EM.

Útlitið var bjart hjá Englendingum framan af leik og Wayne Rooney kom liðinu yfir á 29. mínútu með þrumuskoti. Steven Gerrard klúðraði svo dauðafæri áður en varamaðurinn Roman Pavluchenko jafnaði fyrir Rússa á 69. mínútu með marki úr víti sem dæmt var á Wayne Rooney. Brotið átti sér augljóslega stað fyrir utan teig, en spænski dómarinn dæmdi vítaspyrnu. Rússarnir pressuðu stíft eftir jöfnunarmarkið og fjórum mínútum síðar var Pavluchenko aftur á ferðinni. 

Rússarnir eiga leik til góða á Englendinga í riðlinum og og nú munar aðeins tveimur stigum á liðunum. Króatar eru á toppnum og ættu að eiga sigurinn vísan í riðlinum. Englendingar eiga eftir að mæta Króötum á heimavelli sínum, en Rússar eiga eftir leiki gegn Andorra og Ísrael.

Króatar hafa 26 stig á toppi E-riðilsins eftir 10 leiki, Englendingar hafa 23 stig eftir 11 leiki og Rússar hafa 21 stig eftir 10 leiki.