Portúgal slapp með skrekkinn

Einum leik er lokið í undankeppni EM 2008 í dag. Portúgal vann góðan en nauman útisigur á Kasakstan, 2-1.

Markalaust var í áttatíu mínútur þar til Cristiano Ronaldo kom Portúgal yfir. Varamaðurinn Ariza Makakula, leikmaður Sevilla, bætti um betur á 90. mínútu og reyndist það mark dýrmætt því heimamenn minnkuðu muninn skömmu síðar. Dmitri Byakov var þar að verki.

Portúgal er nú í öðru sæti A-riðils með 23 stig, einu stigi á eftir Pólverjum. Finnar eru í þriðja sæti með 20 stig og ríkir mikil spenna um hvaða tvö lið fara áfram í úrslitakeppni EM 2008.

Hvorki Finnar né Pólverjar eiga leik í dag en í síðustu umferðinni mætast lið Portúgals og Finnlands í leik sem gæti ráðið úrslitum um hvort liðið fer til Austurríkis og Sviss á næsta ári.