Beckenbauer: Þýskaland besta lið Evrópu

Goðsögnin Franz Beckenbauer segir að Þýskaland sé með besta lið Evrópu í dag.

„Þýskaland er bæði besta og stöðugasta lið Evrópu um þessar mundir,“ sagði Beckenbauer í viðtali við heimasíðu þýska knattspyrnusambandsins. „Liðið hefur jafnvel bætt sig frá síðustu heimsmeistarakeppni.“ 

Þýskaland varð fyrsta liðið til að tryggja sér sæti í úrslitakeppni EM 2008 eftir markalaust jafntefli gegn Írum um helgina.

„Önnur lið, eins og Ítalía, Frakkland og England, hafa gefið eftir. Sum þeirra eiga í vandræðum með að tryggja sér sæti í úrslitakeppninni.“ 

„Liðið hefur tekið risastórt stökk fram á við og er mikið meistaraefni. Það væri frábært ef Löw gæti haldið áfram með liðið enn lengur. Eins og er eru hann og aðstoðarmenn hans bestir í sínu fagi.“

Undir stjórn Joachim Löw hefur þýska landsliðið unnið tólf af fimmtán viðureignum sínum. Hann tók við liðinu af Jürgen Klinsmann að heimsmeistarakeppninni lokinni í fyrra. 

Þýskaland mætir Tékkum í D-riðli á morgun. Leikurinn skiptir Þjóðverja engu máli en gæti haft mikil áhrif á vonir Tékka um að komast áfram.