Grétar líklega ekki með gegn Liechtenstein

Bjarni Jóhannsson aðstoðarlandsliðsþjálfari segir það afar ólíklegt að Grétar Rafn Steinsson verði með íslenska landsliðinu gegn Liechtenstein á miðvikudag.

„Hann fékk mikið högg og bólgnaði mjög mikið," sagði Bjarni. „Hann er þó með okkur og er í meðhöndlun en læknaliði okkar líst ekki á blikuna."

Þá er Veigar Páll Gunnarsson farinn heim til Noregs en hann meiddist á æfingu á föstudaginn og var ekki í leikmannahópnum gegn Lettum á laugardag.

„Þessi 22 manna leikmannahópur er nú orðinn að tuttugu, í rauninni," sagði Bjarni.

Það er þó bót í máli að Hermann Hreiðarsson er nú orðinn gjaldgengur á nýjan leik en hann tók út leikbann í leiknum gegn Lettum.

Auk hans og Veigars voru þeir Ásgeir Gunnar Ásgeirsson og Ólafur Örn Bjarnason utan leikmannahópsins um helgina.

Landsliðið er nú statt í Lundúnum þar sem það gisti í nótt. Seinni partinn flýgur það til Zürich þaðan sem það keyrir til Vaduz í Liechtenstein.

„Við ákváðum að gera þetta svona því ef við hefðum ætlað að fara til Liechtenstein í einum rykk hefðum við þurft að vakna klukkan fjögur í morgun og værum svo ekki komnir á áfangastað fyrr en klukkan hálf níu í kvöld."

Liðið æfði í World Class í gær og flaug svo seinni partinn til Lundúna. Í morgun æfði liðið á æfingasvæði Queens Park Rangers, sem er í námunda við flugvöllinn þaðan sem landsliðið flýgur í dag.