Þjóðverjar fyrstir til að tryggja sig áfram

Þýskaland er eina landið í undankeppni Evrópu sem er nú þegar búið að tryggja sér annað tveggja efstu sætanna í sínum riðli.

Þjóðverjar gerðu um helgina markalaust jafntefli við Írland og gulltryggðu um leið að þeir verða meðal þeirra sextán þjóða sem keppa í úrslitakeppni EM í Austurríki og Sviss á næsta ári.

Tvö önnur lið eru nálægt því að tryggja sér sæti í úrslitakeppninni. Þetta eru Króatía í E-riðli og Svíar í F-riðli.

Króatar unnu Ísrael um helgina og hafa átta stiga forskot á Rússa sem eiga þrjá leiki eftir. Rússar eru í þriðja sæti og þyrftu að vinna alla sína leiki sem og að treysta á að Króatar tapi báðum sínum leikjum.

Svíar tryggja sér sæti í Austurríki og Sviss ef þeir vinna Norður-Íra á miðvikudag. Svíar unnu Liechtenstein um helgina og er hörð barátta framundan við Spánverja um toppsætið í riðlinum.

Þessi tvö lið, Spánn og Svíþjóð, mætast í næstsíðustu umferð riðilsins á Spáni í næsta mánuði.

Spánverjar standa einnig vel að vígi eftir sigur á Dönum um helgina og þyrfti ansi mikið að gerast ef þeir ættu að fara að klúðra öðru sætinu í riðlinum.