Mikil gleði í Skotlandi

Mikil gleði ríkir í Skotlandi eftir glæstan sigur landsliðsins á Úkraínu í gær. Skotland á eftir að leika tvo leiki í undankeppni Evrópumótsins og er sem stendur í efsta sæti í sínum riðli, ansi óvænt.

Alex McLeish, landsliðsþjálfari Skotlands, er í skýjunum með frammistöðu sinna manna á Hampden í gær. „Þetta var glæsilegur sigur. Mínir menn komu ótrúlega ákveðnir til leiks og byrjunin á leiknum var ótrúleg," sagði McLeish.

Skotland var komið í 2-0 eftir aðeins tíu mínútna leik og vann á endanum 3-1 sigur. „Væntingarnar fyrir þennan leik voru miklar en við stóðum undir þeim og gott betur. Með hverjum sigurleiknum hefur sjálfstraust liðsins aukist. Ég er orðlaus," sagði McLeish.

Skotar eru með 24 stig í efsta sæti B-riðils, Ítalía er í öðru með 23 stig og Frakkland er með 22 stig. Þessi þrjú lið skera sig úr í riðlinum.