Barry heldur sæti sínu

Miðjumaðurinn Gareth Barry hjá Aston Villa heldur sæti sínu í enska landsliðinu sem mætir Eistum á Wembley nú klukkan 14 og verður í beinni á Sýn. Frank Lampard þarf því að sætta sig við að sitja á bekknum í dag. Sol Campbell tekur stöðu John Terry í vörninni.

"Frank Lampard hefur aldrei brugðist enska landsliðinu, en við lögðum upp með að nota óbreytt lið nema yrðu meiðsli í hópnum og við erum mjög sáttir við byrjunarliðið í dag," sagði Steve McClaren, landsliðsþjálfari Englands í viðtali við breska ríkissjónvarpið í dag.

Þau tíðindi hafa nú borist úr herbúðum enska liðsins að John Terry hafi lítið geta æft með enska liðinu og að hann sé mjög tæpur fyrir leikinn gegn Rússum í vikunni. 

Lið Englendinga:

Byrjunarlið: Paul Robinson, Micah Richards, Rio Ferdinand, Sol Campbell, Ashley Cole, Shaun Wright-Phillips, Steven Gerrard (fyrirliði), Gareth Barry, Joe Cole, Wayne Rooney, Michael Owen.

Varamenn: Joleon Lescott, David James, Phil Neville, Frank Lampard, David Bentley, Peter Crouch, Jermain Defoe.