Við verðum að vinna

Dana bíður nú mjög erfitt verkefni í F-riðli undankeppni EM á laugardaginn þegar þeir taka á móti Spánverjum í Árósum. Þjálfarinn Morten Olsen segir að ekkert annað en sigur dugi liðinu ef það ætli sér að eiga möguleika á að komast upp úr riðlinum.

"Þetta er mjög einfalt. Við verðum að vinna," sagði Olsen. Danska liðið virtist dæmt úr leik í júní eftir að Svíum var dæmdur 3-0 sigur í dramatískum leik þeirra á Parken, en þar var leik hætt á 89. mínútu eftir að ráðist var á dómarann.

Óhagstæð úrslit fyrir Spánverja og Norður-Íra hafa hinsvegar þýtt að Danirnir eiga enn möguleika í riðlinum. Þeir eru í fjórða sæti með 14 stig - fimm stigum á eftir Svíum og Spánverjum og tveimur á eftir Norður-Írum. Þeir eiga inni leiki gegn tveimur síðustu liðunum.

Christian Poulsen frá Sevilla er nú kominn aftur inn í danska hópinn eftir þriggja leikja bann sem hann fékk fyrir að kýla Markus Rosenberg í leiknum örlagaríka í júní. "Ég er búinn að gjalda fyrir mistökin og nú langar mig að gera allt sem ég get til að hjálpa liðinu að ná í stig," sagði Poulsen í samtali við danska fjölmiðla.

Vörn danska liðsins mun ekki veita af endurkomu Poulsen því miðvörðurinn Daniel Agger frá Liverpool er meiddur og í hans stað kemur Michael Gravgaard frá FC Kaupmannahöfn.

Pressan á Spánverja er ekki síðri í leiknum, því þó spænska liðið hafi haft betur 2-1 í fyrri leik liðanna í Bernabeu í mars - hefur spænska liðið ekki þótt sérlega sannfærandi í 1-1 jafntefli við okkur Íslendinga og 2-0 sigri á Lettum.

Markahrókurinn David Villa verður ekki með Spánverjum í Árósum en Luis Aragones þjálfari getur þó huggað sig við að hafa úr mjög breiðum hópi miðjumanna að ráða þó Xabi Alonso sé meiddur og í leikbanni.

"Þetta verður gríðarlega erfiður leikur þar sem Danirnir eru erfiðir heim að sækja. Allt er í húfi fyrir bæði lið og við verðum að vera á tánum frá fyrstu mínútu ef við eigum að landa sigri þarna," sagði bakvörðurinn Joan Capdevila frá Villarreal.