Byrja á fyrstu djúpborunarholunni næsta sumar

Hafist verður handa við að bora fyrstu djúpborunarholuna hér á landi við Kröflu næsta sumar samkvæmt samkomulagi sem kynnt var í dag. Holan verður 4-5 kílómetra djúp. Þá verða boraðar tvær aðrar djúpar holur, á Reykjanes og á Hengilssvæðinu.

Að samningnum standa Hitaveita Suðurnesja, Landsvirkjun, Orkustofnun, Orkuveita Reykjavíkur og Alcoa sem bætist í hóp þeirra sem fjármagna rannsóknir hins svokallaða Íslenska djúpborunarverkefnisins. Eftir því sem fram kemur í tilkynningu munu Landsvirkjun, HS og OR láta bora hvert sína holan niður á 3,5 kílómetra dýpi og mun það kosta á bilinu 700 milljónir til einn milljarð.

Félögin þrjú munu svo ásamt Orkustofnun og Alcoa starfa saman að Íslenska djúpborunarverkefninu, IDDP, sem felst í því að holan við Kröflu verður dýpkuð um kílómetra og gerðar ýmsar rannsóknir sem snúa meðal annars að berginu og borholuvökvanum. Sú dýpkun kostar um einn milljarð og verður því um þremur og hálfum milljarði samtals varið til djúpborana á næstu þremur til fjórum árum.

Auk þessara fyrirtækja leggja International Continetal Scientific Drilling Program og bandaríski vísindasjóðurinn NSF til um 300 milljónir króna til að taka borkjarna til vísindarannsókna í tengslum við IDDP. Bæði innlendir og erlendir sérfræðingar taka þátt í rannsóknunum og munu flestir afla fjár sjálfir til rannsókna sinna.

Borholur valdi litlum umhverfisspjöllum

Enn fremur er bent á í tilkynningu frá aðstandendum IDDP að borun holanna valdi litlum umhverfisspjöllum því þær verði boraðar niður úr virkjuðum háhitasvæðum. Unnið er að tilkynningu til Skipulagsstofnunar um djúpborunarholuna að Kröflu og á næstu vikum verður haft samband við lögbundna umsagnaraðila. Samið verður við Jarðboranir um borun holunnar og verður stærsti og öflugasti bor þeirra notaður til verksins.

Reiknað er með að borun hefjist seinni hluta næsta sumars og að rannsóknir á árangri geti jafnvel staðið til ársins 2015. Ef vel tekst til er vonast til að djúpu holurnar verið 5-10 sinnum öflugri en venjulegar holur og gefið allt að 50 megavött hver. Vara menn þó við bjartsýni því mörg ár líði þar til árangur komi í ljós.