Földu 1,7 kg af kókaíni á aðaljárnbrautarstöðinni í Kaupmannahöfn

Íslenska kókaínparið sem nú er í haldi í Kaupmannahöfn faldi 1,7 kg af kókaíni á aðaljárnbrautarstöðinni í borginni. Parið hefur neitað að tjá sig um málið í yfirheyrslum hjá rannsóknardeild miðborgarlögreglunnar. Samkvæmt upplýsingum frá Hendrik Svind, yfirmanni deildarinnar, má rekja upphaf málsins til þess að lögreglumenn höfðu tilefni til að hafa afskipti af hinum 36 ára gamla Íslendingi á kaffihúsi við Vesterbro og fundu í fyrstu rúmlega sjö grömm af kókaíni í fórum hans.

Hendrik Svind segir að auk þess að finna kókaínið í fórum mannsins var hann með lykil að hótelherbergi á nærliggjandi hóteli. Lögreglumennirnir héldu því næst þangað og þar var hin tvítuga vinkona hans til staðar. Ekkert kókaín var að finna í herberginu.

„Hinsvegar fundu lögreglumennirnir lykil að farangursgeymsluboxi á aðaljárnbrautarstöðinni," segir Hendrik Svind í samtali við Vísi. „Og í því boxi fannst svo 1,7 kíló af kókaíni í nokkrum pakkningum." Hendrik segir enn fremur að við athugun á öryggismyndavélum á járnbrautarstöðinni sjáist greinilega að parið setur pakkningarnar í boxið.

Sem fyrr segir hefur parið neitað að tjá sig um málið við yfirheyrslur utan að bera fyrir sig sakleysi í málinu. Aðspurður segir Hendrik að parið hafi komið frá Íslandi nokkru áður en það var handtekið og því gengur lögreglan út frá því sem vísu að kókaínið hafi verið keypt í Kaupmannahöfn.

Hendrik segir að parið verið áfram í gæsluvarðhaldi þar til mál þess verður tekið fyrir í héraðsdómi í Kaupmannahöfn. Aðspurður um hve langan dóm hann telji að parið fái segir Hendrik að hann geti ekki sagt til um það. „En þetta kostar," segir Hendrik. „Dómurinn verður örugglega upp á fleiri ára fangelsisvist."