Leysir ekki vandann að dreifa skemmtanahaldi um borgina

Lögreglan dreifði liði sínu víðar en í miðborgina um helgina vegna óláta við dansleikjahald í Hlégarði í Mosfellsbæ og á Seltjarnarnesi. Lögreglan varð fyrir grjótkasti á Nesinu. Samfylkingarmenn segja að þetta sýni að það leysi ekki vanda miðborgarinnar að dreifa skemmtanahaldi um höfuðborgarsvæðið.

Lætin hófust þegar maður var handtekinn á Laufvangi Hafnarfirði við að brjótast inn í sameign fjölbýlishúss. Ætla má að maðurinn hafi verið að svipast um efttir farskjóta því hann var gripinn inn í hjólageymslunni.

Líkamsárás varð á Bíldshöfða en þar réðst hópur á einn mann. Maðurinn hafði aldrei hitt árásarmennina fyrr. Ekki er enn ljóst hverjir árásarmennirnir voru og er málið í rannsókn.

Teiti unglinga var leyst upp í Dugguvogi og voru engin leyfi fyrir hendi til skemmtanahalds.

Dyravörður skarst í andliti á Gauk á Stöng þegar hann var að vísa manni út af staðnum. Maðurinn var ekki sáttur og sló dyravörðinn í andlitið með vínglasi. Árásarmaðurinn var handtekinn og látinn sofa úr sér í fangageymslum.

Í Garðabær missti ökumaður bifreið sína út af veginum. Ekki reyndist unnt að yfirheyra hann vegna ölvunar og var hann vistaður í fangageymslum.

Dyraverðir á dansleik Stuðmanna á Seltjarnarnesi óskuðu eftir aðstoð en þeir höfðu þrjá menn í haldi. Lögreglumenn sem komu á staðinn urðu fyrir grjótkasti auk þess sem hent var í þá flöskum. Maður sem var að gera sig líklegan til að kasta grjóti, lamdi því í þess stað í brjóst lögreglumanns. Hann lagði síðan á flótta, og reyndi að kasta flösku í lögreglumann á hlaupunum. Þessu til viðbótar braut maður rúðu lögreglubíls með grjóti á Nesinu.

Talsmaður Samfylkingarinnar í málefnum miðborgarinnar segir að um helgina hafi lögreglan verið upptekin við verkefni utan miðborgarinnar og því ekki verið nægjanlega sýnileg þar.

Hópslagsmál urðu við Sportbarinn í Hafnarfirði en gerendur voru farnir af vettvangi þegar lögreglan birtist. Maður var fluttur á slysadeild en vildi ekki tjá sig um gerendur í þessu máli.

Við Hlégarð í Mosfellsbæ var maður sleginn í höfuð með flösku. Maðurinn var fluttur á slysadeild í lögreglubíl. Ekki liggur fyrir hver hafði reitt til höggsins.