Ajax sigraði PSV Eindhoven 1-0

Ajax bar sigurorð af PSV Eindhoven í árlegum úrslitaleik um ofurbikarinn í Hollandi þegar liðin áttust við í Amsterdam í gær.

Leikurinn jafnast á við góðgerðarskjöldinn á Englandi og markar upphaf keppnistímabilsins þar í landi en um þennan titil keppa ávalt ríkjandi Hollandsmeistarar og bikarmeistarar. PSV urðu meistarar í vor en Ajax vann bikarinn. Átta fastamenn vantaði í byrjunarlið Ajax í gær, þeirra á meðal miðjumanninn Wesley Sneijder sem var í leikbanni en svo gæti farið að hann hafi leikið sinn síðasta leik fyrir félagið þar sem Real MAdrid er á höttunum eftir honum og gerði tilboð í hann á föstudag.

Einnig vantaði nokkra lykilmenn í lið meistara PSV. Þrátt fyrir nokkur ákjósanleg marktækifæri var aðeins skorað eitt mark í leiknum og það kom tveimur mínútum fyrir lok fyrri hálfleiks. Það skoraði Spánverjinn Gabri fyrir Ajax sem hafði talsverða yfirburði í leiknum. Bikarmeistararnir hefðu auðveldlega getað bætt við fleiri mörkum en lokatölur urðu 1-0 og Ajax hirti ofurbikarinn þriðja árið í röð. Keppni í hollensku úrvalsdeildinni hefst um næstu helgi en Ajax leikur við Slavia Prague í forkeppni Meistaradeildarinnar á miðvikudaginn.