Deilur um Hornafjarðarveg

Lögfræðingur Vegagerðarinnar segir tillögur hóps bænda og landeigenda í Nesjum um vegstæði yfir Hornafjarðarfljót ekki samræmast markmiðum framkvæmdarinnar um umferðaröryggi og styttingu hringvegarins. Hópur bænda og landeigenda í Nesjum hefur stefnt íslenska ríkinu og Vegagerðinni og lagt fram eigin tillögur að lagningu vegarins.

Hópurinn krefst þess að matsáæltun vegna umhverfismats lagningar hringvegar um Hornafjarðarfljót verði felld úr gildi og að tvær nýjar veglínur verði teknar inní áætlunina og metnar til jafns við þær þrjár sem Vegagerðin lagði til. Aðeins þær línur sem fara í umhverfismat koma til greina þegar endanleg ákvörðun um vegstæðið verður tekin.

Að því er fram kemur á fréttavefnum Horn.is þá hefur Karl Axelsson lögfræðingur hópsins gagnrýnt að þessir kostir væru ekki teknir til skoðunar og taldi að það samræmdist ekki markmiðum laga um mat á umhverfisáhrifum að meta ekki alla raunhæfa kosti. Haft er eftir Stefáni Erlendssyni, lögfræðingi Vegagerðarinnar að hann sé ekki sammála því að tillögur hópsins séu raunhæfir kostir því þær samrýmist ekki meginmarkmiðum framkvæmdarinnar um styttingu hringvegarins og umferðaröryggi.