Fulltrúadeild Bandaríkjaþings vill herinn heim fyrir apríl

Fulltrúadeild Bandaríkjaþings hefur samþykkt lög þess efnis að herlið Bandaríkjanna hverfi frá Írak fyrir apríl á næsta ári.

 

 

Lögin gera ráð fyrir því að varnarmálaráðuneytið byrji að kalla herliðið til baka eftir fjóra mánuði. George W Bush, Bandaríkjaforseti, hefur fullyrt að hann muni beita neitunarvaldi gegn öllum tillögum um tímasetningar á brottnámi hersins frá Írak. Talið er að fulltrúadeildin sé með þessari löggjöf að þrýsta á öldungadeildina að samþykkja svipaða tímaáætlun. Þetta er í þriðja skipti á þessu ári sem fulltrúadeildin samþykkir að enda hernaðaraðgerðir í Írak. Tvær fyrri tillögurnar voru felldar í öldungadeildinni eða hafnað af Bush.

 

 

Nýjasta tillagan felur í sér að hluti bandarísku hersveitanna fær að vera áfram í Írak til að þjálfa íraska herinn og vinna að gagnhryðjuverkaaðgerðum.