Kallaður heim frá útlöndum til yfirheyrslu

Viggó Þórir Þórisson, framkvæmdarstjóri verðbréfasjóðs Sparisjóðanna hefur verið kallaður til yfirheyrslu hjá lögreglu vegna meintrar bókhaldsóreiðu. Framkvæmdastjóranum var fyrirvaralaust vikið úr starfi og þótti málið það alvarlegt að hann var kallaður heim frá útlöndum, en hann var á ferðalagi þegar málið kom upp.

Samkvæmt heimildum fréttastofu mun Viggó hafa gefið út skuldaviðurkenningu uppá tugi ef ekki hundruð milljóna króna í nafni verðbréfasjóðsins, VSP til erlends fyrirtækis. Ekki er enn vitað hvort um ásetningsbrot hafi verið að ræða eða hvort Viggó hafi skrifað upp á skuldaviðurkenninguna í góðri trú.

Þrátt fyrir það þá er ljóst að viðskipti Viggó eru afar vafasöm og ná langt út fyrir allar heimildir. Einn heimildarmanna fréttastofu orðaði það svo að ef málið færi það langt að verðbréfasjóðurinn þyrfti að greiða upphæð skuldaviðukenningunnar þá myndi það ríða sjóðnum að fullu. Af því má draga þá ályktun að um milljarða króna sé að ræða.

Fréttastofa fékk ábendingu um málið í morgun og eftir að farið var að grennslast fyrir um málið sendi stjórn verðbréfasjóðsins frá sér fréttatilkynningu þar sem fram kemur að í ljós hafi komið að mistök hafi átt sér stað í störfum framkvæmdarstjóra og að honum hafi verið sagt upp þegar í stað. Eins kemur fram í tilkynningunni að málið hafi verið tilkynnt til saksóknara efnahagsbrota ríkislögeglustjóra

Málið er allt hið viðkvæmasta enda eru reglur um neytendavernd mjög strangar og mikil hætta á að hluthafar innleysi bréf sín enda mál sem þetta mikill álitshnekkir fyrir VSP.

Birgir Ómar Haraldsson, stjórnarformaður VSP, sagði í samtali við fréttastofu engu vilja bæta við fréttatilkynningu VSP um málið.