Klíkumyndun og fjárhættuspil sögð ástæða slaks gengis West Ham

Klíkumyndun og fjárhættuspil fyrir tugi þúsunda punda innan leikmannahóps West Ham er meðal þess sem sagt er hrjá félagið en það stendur nú í harðri fallbaráttu í ensku úrvalsdeildinni. Þetta kemur fram í grein á vef Guardian í gær. Þar segir að leikmenn, knattspyrnustjóri og stjórnendur félagsins, sem eru íslenskir, viti að þeir geti ekki hindrað það að liðið falli úr úrvalsdeildinni.

Guardian hefur eftir ónefndum leikmanni West Ham að leikmenn hafi tapað allt upp í 50 þúsund pundum, jafnvirði 6,5 milljóna króna, í fjárhættuspilum í liðsrútunni á leið á leiki. „Ég hef aldrei sé að annað eins á ferli mínum. Það eru tóm vandræði, andrúmsloftið hræðilegt og menn ræða ekki hver við annan," segir leikmaðurinn í samtali við Guardian.

Í greininni segir enn fremur að einn af leikmönnum liðsins, sem sé reyndur landsliðsmaður, hafi unnið 38 þúsund punda af félögum sínum á einu síðdegi og krafist peninganna. Alan Curbishley, knattspyrnustjóri liðsins, tali ekki lengur við leikmanninn vegna þessa. Þá munu tveir leikmenn hafa leitað sér aðstoðar vegna spilafíknar og sá þriðji á leiðinni. Mun Curbishley nú hafa bannað fjárhættuspil á ferðum liðsins en hefur ekki getað stöðvað þau utan æfinga.

Við þetta bætist klíkumyndun innan leikmannahópsins, spenna milli Curbishleys og leikmanna og efasemdir um ákvarðanir Eggerts Magnússonar, stjórnarformans félagsins, að því er Guardian greinir frá.

Þá er enn fremur haft eftir leikmanninum ónefnda að annar leikmaður, sem nýverið gekk til liðs við West Ham, hafi orðið undrandi þegar hann hafi verið boðaður á fund með stjórnendum félagsins á nektarstað, en félagið neitar því að fundurinn hafi átt sér stað.

West Ham er nú á botni úrvalsdeildarinnar og hefur aðeins unnið einn leik frá því að Alan Curbishley tók við liðinu eftir jól og liðið á níu leiki eftir, þar á meðal gegn Arsenal, Manchester United og Chelsea, og því verður staða liðsins að teljast ansi erfið.