Davíð segir að krónan verði áfram gjaldmiðill Íslendinga

Halldór Ásgrímsson, fyrrverandi forsætisráðherra, lýsti í viðtali á gamlársdag miklum efasemdum um að Íslendingar gætu til lengri tíma haldið úti sjálfstæðum gjaldmiðli. Valgerður Sverrisdóttir lýsti sömu efasemdum í hádegisviðtalinu á Stöð 2 gær. Ekki væri hægt að neita því að vandamál væri að halda krónunni. Valgerður kvaðst þó aldrei hafa sagt að hægt yrði að taka upp evru án þess að ganga í Evrópusambandið. Hún teldi að mjög litlar líkur væru á því að það væri hægt. Það þyrfti hins vegar að ræða þetta mál og finna lausn.

Sigurður Einarsson, stjórnarformaður Kaupþings, sagði á ráðstefnu í Kaupmannahöfn í gær, að íslenska krónan væri of lítill og óstöðugur gjaldmiðill og myndi hverfa með tímanum. Hvatti hann til þess að Íslendingar tækju þátt í myntsamstarfi Evrópu og tækju upp evru.

Davíð Oddsson segir nokkuð öruggt að Íslendingar muni búa við krónuna til næstu ára, kannski áratugs og næstu áratuga. Í rauninni detti engum í hug í fullri alvöru að kasta krónunni og taka upp annan gjaldmiðil, evru eða dollara, án þess að það yrði þá nánara bandalag. Menn myndu þá ganga í Bandaríkin vegna dollars eða ganga í Evrópusambandið vegna evru.

Forstöðumenn fyrirtækja sem mælt hafa með evru hafa staðhæft að Íslendingar skerði lífskjör sín og hagvöxt með því að halda í krónuna. Davíð bendir hins vegar á að hagvöxtur á íslenska krónusvæðinu hafi verið miklu meiri á undanförnum árum heldur en á evrusvæðinu.